المرونة

 في إحدى عصور الساموراي ، اشتهر "بايكن" بهزيمة جميع خصومه بسلاحه المميت -- والي كان بيتكون من (منجل) مع سلسلة طويلة في طرفها كرة معدنية.

في يوم من الايام ، طلب احد المقاتلين من "بايكن" انه يوريه ازاي بيستخدم سلاحه في مبارزاته... فرد "بايكن" على المقاتل : ان الطريقة الوحيدة عشان يعرف هي انه يبارزه !

وافق المقاتل على التحدي ، واتفقوا على موعد المبارزة في احد الخيمات...لكن وقت المبارزة ، تفاجأ "بايكن" بحاجة مكانش متوقعها !...ظهر المقاتل بسيفين : واحد منهم طويل والتاني قصير !... واثناء حيرة "بايكن" و تجمده في مكانه ، بدأ المقاتل بالهجوم بسيفه القصير على "بايكن" بضربة افقدته توازنه متبوعة بضربة بسيفه الطويل...لتتلاشى في النهاية اسطورة "بايكن" !

"موساشي" الي هزم "بايكن" والي بقى لاحقا اعظم ساموراي في زمنه ، بيقول في كتابه (The Book of Five Rings) : "العين المراقبة قوية (the observing eye is strong)...العين الإدراكية ضعيفة (the perceiving eye is weak) !"... يقصد ان العين الي بتشوف الحاجات على حقيقتها بدون إضافة عليها اوهام وتصورات -- هي الي دائما بتتعدى العقبات و التحديات !

"موساشي" في منازلاته مكانش بيبص على سمعة المقاتلين او اسلحتهم الي هزموا بيها خصومهم السابقين ، لكن كان بيبص على نقط ضعفهم وتمسكهم بسلاح او اسلوب ابتكروه مرة واحدة واعتادوا عليه ، ويبتكر هو ساعتها السلاح والاسلوب الانسب مع كل مقاتل...فكان بيفكر باسلوب موضوعي بحت (objective)، و بيشوف الحقيقة من وراء الوهم او الاسطورة !

في حياتنا بيمر علينا مواقف فيها تحدي بنديها غالبا اكبر من حجمها الحقيقي ، وبنبني عليها مشاعر سلبية وتصورات بتخلينا نعجز اننا نفكر بموضوعية و نشوف عوامل حوالينا ممكن تخلينا نمر من العقبات بإبداع...لكن في الغالب بتطغى علينا العين الإدراكية (perceiving eye) الي بتخلينا غير متصلين بالحاضر و بنشوف الامور على غير حقيقتها !

محتاجين ندرب نفسنا اننا نشوف الامور على ما هي عليها (observing eye) ونكتسب مرونة في اننا نغير اساليبنا الي اعتدنا عليها حسب المواقف والظروف الي بنتعرض لها.